Im rujonədə dınyo şiəyon 3 minnə İmom, İmom Huseyn(ə)-i şəhodəti Ərbəini astanədə, İroni muxtəlifə şəhronku zairon, İlam ostanədə Mehran beynəlxalğə marziku dəvardey holədən ta bə Kərbəlo iyən Beynol-Hərəmeyni səmt bışon.
Boçimi xoto ki Mehran beynəlxalğə marz bə Kərbəlo muğəddəsə şəhri vey neze, Ərbəine Huseyni(ə) şemonədə zairon iştirokiro bənə vey muhimmə marzi bə hisob omeydə iyən vəoməy rujonədə veyə zairon ıştəni bə Mehran marz iyən terminali rosneydən.
Ərbəine Huseyni(ə) milyoniyə şemonədə iştirokiro, Mehran beynəlxalğə marzədə zairon iştirok, çı jen, mırd, cıvon, nocıvon və hırdənon hərorətinə eşği nişonəy.
Bə İran Peres aqentiyəti raporti əsos, har zair de məxsus şivə, olət iyən zıvği əsos, ısət bə Kərbəlo səmt hərəkət karde holədəy.
İmom Huseyn(ə)-i eşğ və şəhidon əğə muğavimət, iyən ozodəti, zaironro Ərbəine Huseyni(ə) şemoni royədə bıə saxtion vey hostonış kardədə.
Əlovə bə ım Mehran beynəlxalğə marzədə xıdmət xeyməon və damon və səhiyyə imkanaton icod bıə ta lozimə şəroyetədə bə Ərbəine Huseyni(ə) zairon komək bıbu.
Həmçınin bə İlam ostani qomroki elami əsos, 750 qılə boy avtomobil, tereyler iyən co qıvonə maşinon ki muxtəlifə əbzaron və təchizoton şomilin Mehran marziku bə İraği varid bıən ta Ərbəine Huseyni(ə) şemoni royədə bə zairon xıdmət bırosnon.