Rusiya-Ukrayna cəbhədə vəziyyət.

Rusiya-Ukrayna qəpon dıminə raundi bino bıe həxədə Ukrayna tərəfi məlumat doşe ki, marti 2-ədə de Rusiya molağaton dəvom bəkarde. Peşo, marti 2-minə ruji orəxədə Rusiya numayəndon sərdar Medinskiy izah kardışe ki, Ukrayna numayəndon ro diəro bıe səbəbiku, əvon marti 3-minə ruji bə didori məkan ome rəse bəzınen. Marti-3 minə rujiən Ukrayna numayəndon bə didor nıomin. Medinskiy bə jurnaliston jıqo votışe, imkan heste ki, molağaton maşkinə ruji, yəni marti 4-ədə sə bığəto. Əmo peşçoştə xəbə ome ki, Urkayna tərəf bə didor dəro qıniə, molağat de Moskva vaxti saat 17-ədə çe Belorusiya Brest vilayətədə bino bəbe.  

Rusiya Mudafiə Vəzarəti rəsmi numayəndə qeneral Konaşenkovi doə orəxnə məlumatədə votə bedə ki, 6 rujnə hərbi əməliyyaton nəticədə çe rəğibi 1612 qılə hərbi infrastruktur obyekton – əz cumlə 606 qılə tank və co zirehinə texnika,  62 qılə idarə kardə mərkəz,  81 qılə zenit raket komplekson C – 300, “Buk”, “Osa”, 75 qılə radiolokasiya stansiya, 62 qılə hərbi həvopeyma, 53 qılə bepilotə aparat məhv kardəşe. Ey tərəfon coninə ğıvvə tələfati rəğəmonən elan kardəşe. Məlum bıə ki, Rusiya Əsləhinə Ğıvvon 498 nəfər hərbiəvon həlok, 1597 nəfər isə zəxmin bıən. Ukrayna tərəfi tələfat 2870 nəfər, zəxmin bəkəson miğdar isə 3700 nəfəre, 572 nəfər isə bə Rusiya tərəfi əsir eqıniə. Rusiya ərteşi Çistopolye, Novopoltavka, Jovtnevoy şəhəron bəştə nəzarəti ji dənoəşe.

Luqansk Respublika ərteşi tosə martə manqi 3-minə ruji subhi vaxti  75 km bə nav şə, ıştə vilayəti 50 qılə məntəğə çe Ukrayna ərteşi nəzarətiku bekardəşe, əyo ıştə hokumət  bərğəror kardəşe. 34 nəfər Ukrayna hərbiəvon bə çəvon tərəf ovaştə. Donetsk Respublika isə ıştə vilayəti 37 qılə məntəğə azad kardəşe. Im məlumaton həmonə reapublikon mətbuatə xidməti rəsmiyon ıştə Teleqram kanalonədə xəbə doəşone.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.