Dəvardə həftə Ğərəboği atəşbastə xəttədə vəziyyət qıvonin bıe, tərəfon arədə tirəndazi bə əməl ome, çand qılə sərboz həlok və zəxmin bin
Dəvardə həftə Ğərəboği atəşbastə xəttədə vəziyyət qıvonin bıe, tərəfon arədə tirəndazi bə əməl ome, çand qılə sərboz həlok və zəxmin bin. Jıqo vəziyyətədə İbə Milləton Təşkilat, Amerika İbə Ştaton, Fransa, Yunanıston və həniən co devləton çe ım faktiku ıştə norohəti bəyon kardışone, tərəfon dəvət kardışone ki, ıştə ərteşi ğıvvon bə 9 noyabr 2020 –minə sori elan bıə atəşbastə mevğe okırnon. İbə Ştaton hətto Boku hokumət jıqo beməsuliyyətə hərəkətədə qınokar zıneşe. Rusiya Xarici Koon Vəzarətiən ıştə elan kardə bəyonatədə təsdığ kardışe ki, Az.R tərəfi 9 noyabr 2020-minə sori ğəbul bıə 3 tərəfinə saziş darıştəşe, de bepilotə ıştənpəron vasitə bə Bandə Ğərəboği hərbiə hissə Furux məntəğədə 4 qılə zərbə jəşe. Çəyoən əv dəvət kardışe ki, ıştə zəbt kardə mevğeon tərk bıkardo.
Az.R Mudafiə Vəzarəti çe Rusiya tərəfi jıqo məzmuninə bəyanatiku təəssuf ifadə kardışe, votışe ki, həmonə bəyonat həğiğəti əks kardedəni. Çe Boku Kutləviə İnformasiya vasitonədə isə ım hadisə jıqo bə ğələm doşone ki, quya erməni hərbi ğıvvon bə Azərbaycani ərteşi hissə tərəf təxribat bino kardəşone, Azərbaycani hərbiəvononən bəvon cəvob doəşone. Hokumət mevğeyinə “Teref.az” sayti hətto nıvıştışe ki, “nə İMT, nə Amerika Devlətə departamenti, nə Fransa, nə Rusiya bəyanaton bəpe bə Boku ğətiyyətinə qəm şodoe mane nıbo. Hiç kəs bəmə hiççi karde əzıni.” Boku xeyli co informasia resursonədən Ukrayna canqi tiğoniədə Azərbaycani ərteşi Zanqəzuri bə dast varde vanqonən bə meydon beşe. Bə ım cur şuaron nəzərən “İnfoteka 24” sayti çe SEPAH-i Teleqram kanaliku qıley sitat bə çəvon yod vardışe ki, “Bə Ermənistoni ərazi har qıley dəfırsiə hərəkət bə İroni hərbiə ğıvvon reaksiya səbəb bəbe.”
Boku hokuməti ım hərəkəton bə Ukrayna hakim dairəon rəğbəti səbəb bıe, çey Milli Əmniyyətə Xidməti sədr Aleksey Danilov Qurcistonədən jıqo qıley “dıminə cəbhə” oj karde de Rusiya mubarizə roədə əhəmiyyətin hisob kardışe. Əmo Qurcistoni parlamenti həm hakim, həm muxalif partiya deputaton ım ideya bə qurci xalği mənafe zidd zıneşone. Muxalif “Qirçi” partiya parlamantə deputat Sandro Rakviaşvili votışe ki, “Tbilisi hətto bəştə ğələbə əmin bıboən, bəpe bə Abxaziya əleyh muharibə bino nıko”.
Jıqo məğamədə qirəm Əliyev Ğəfğazədə “dıminə cəbhə” oj bıkardo, bəs bə kom ğıvvon mənafe xidmət bəkarde?
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.