Rusiya Kemruqə Xidməti rəisi muavin Vladimir İvin`i rəhbərəti kardə numayəndə heyət bə Az.R səfər kardəşe, Bokuədə ım dı qılə keşvəron arədə Sadəninə kemruqə rejimi pilot layihə təğdimat mərasim dəvuniəşe
“Sputnik Azərbaycan” sayt xəbə dodə ki, Sankt Peterburğ Universiteti professor Stanislav Tkaçenko votəşe ki, ım proyekt Rusiya de Azərbaycani arədə bə həmkarəti təkon bədo, vəoməyədə hətto bo azad ticarət rejimi onoe ro imkan bə əməl bəvarde. Demiən Azərbaycani və Rusiya məhsulon ım dı qılə devləton arədə bemaneə və surətinə hərəkət karde imkanədə bəbe. Ey həmən ğeyd kardəşe ki, devləton arədə iğtisadi həmkarəti veycəhətinə qıley prosese. Bı koədə çe devlətə orğanon tərəfo bo biznesi inkişafi ro infrastrukturon onoe muhum əhəmiyyət hestışe.
Vladimir İvin ıştə votemonədə ğeyd kardəşe ki, çe Rusiya 7 qılə iğtisadi operator de Azərbaycani 100 qılə şirkəti həmkarəti kardedə, həmonə şirkəton ıştə bə Rusiya ixrac kardə məhsulon 20 faizi de çəmə təklif kardə layihə vasitə realizasiya karde bəzınen.
Çe Rusiya Az.R-ədə ticarətə numayəndə Ruslan Mirsayapov ım tədbir jıqo şərh kardəşe ki, marzi Azərbaycani tərəfədə “Xanoba”, Rusiya tərəfədə “Yaraq-Kazmalyar” ovaştə məntəğəon infrastrukturi coədə onoe, şosse roon hevuj karde bə sodəninə kemruqə rejimi rə qıley muddətədə tətbiği komək bəkarde.
Tədbiri iştirakəkon bə Samur, Şirvanovka və Xanoba marzovaştə məntəğon şən, de kemrukə xidməti məmuron layihədə nəzərədə qətə bıə tədbiron həxədə molağat bardəşone, çəvon nəzəron omutəşone. Məlum bıə ki, Samur-Yaraq Kazmalyar ovaştə məntəğondə əlavə qıley avtomobilə hərəkətə xətt bə istifadə doəşone, ımən sərhədi ovaşte ro nubə çəş kardə avtomobilon miğdar xeyli kam kardəşe. Vəoməyonədə kemruqə xidməti kadron miğdari vey karde, bə şəvı-rujə koə rejim ovaşte jıqo nubə problemi təmom həll karde ro imkan bə əməl bəvarde.
Tədbiri orəxədə Rusiya numayəndə heyəti de Az.R biznes dairə fəalon vindemon dəvuniəşe.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.