Rujəmoə manqədə rujə qəte insonon bə Xıdo məhəbbəti həniən zumand kardedə, bəvon ıştə iradə idarə karde, sof, pok, vicdanin və əğidəmand bıe roədə komək bedə
“Sputnik Azərbaycan” sayt bə Rəməzonə manqi ğaydon dair bə əhandon edaştə məğaləonədə rujə batil nıkardə, əmo məkruh hisob bıə əməlon barədə məlumat doəşe ki, dandon zuə pastaku istifadə, bə vıli bu karde, bə çəşi, quşi, vıni dəvo etılvonie, bənə donori xun doe, qəvi loğabi ebarde, lıputə pomadaku, darzən je, ətiriku, dandonpezeşki xidmətonku istifadə məkruh hisob bıə əməlonədəy.
Rujə qətə muddətədə çəsənə və iftori xorəkonən munasib bəninin. Respublika Səhiyyə Vəzarəti ekspert Qunay İsmayılova de ım məsələ əlağədar de sayti muxbiri qəpədə məsləhət zınəşe ki, rujə qətəkəson çəsənə və iftori vaxti çe sı kardə və obıştə xorəkonku, ruəninə, karbohidrat tərkibinə ğida məhsulonku bəpe istifadə nıkardon, ki, mədədə ğıjiə bə əməl nıvo. Xorəkon həmən vilim bəninin. Bə teyə mədə vey sardonə və ya vey tatə xorəki daxil bıe spazm bə əməl varde bəzıne. Çəsənə xorəkon bə iftori nisbətən sıbık bıbo çoke. Şıt, mos, du, moğnə, mivə, tərəvəz məhsulon ğəbul karde lozime. Sipiə nun rə həzm bıe səbəbiku, siyo nuniku istifadə karde lozime ki, ruji dırozi vəşi qəte kam hiss kardə bıbo. Həddo ziyod suə, təvənə, bibər və ədivəninə xorəkonkuən diəro mande məğbule.
İftori vaxti bəpe anədə nəhəy ki, bə mədə qoni bə əməl bıvardo. Çok bəbe ki, iftori de ovinə xorəki okey. Tikəvone fasilə bə peş, qujdə xorəkon, boxlə, məju, laqə məhsulinə hardəyonku istifadə karde bəbe. Peşo de muxtəlifə aləf və beməyon dəm bıə çay peşome xeyli foydəmand bəbe. Ruji vaxti təşnə kam karde ro iftor və çəsənə miyonədə mineralə ov və co təşnəbıriə maye ğəbul karde lozime.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.