Dınyo mısılmonı ictimaiyyət mubarəkə Rəməzonə manqi Rujə mərasimi dəvom kardedə
Çe Azərbaycani Əhli Beyt (ə) məktəbi nufuzinə tərəfdarono qıley Seyid Elman Ağazadə ıştə YuTub bloqo ehandə bərnamədə votəşe ki, çəmə de Xıdo çanədə ixlasin və səmimi bıe Rəməzonə manqədə zınə bedə. Im manq bəndə bə Xıdo səmimiyyəti nişon doə manqe. Im manqi mərifət çimiku ibarəte; bəpe bızınəmon ki, de Xıdo əmə çanədə səmimi və sof bıe zənedəmon. Çəmə dinədə jıqo qıley dəstur heste; bəndə əməlon həmə bə Xıdo xoto bənine. Sədəğə, nəzır, ehsan doe, nomoj vote, hətto kali məğamonədə qəp je, əsəb karde, motijə mandeyən bə Xıdo xoto bənine. Bəndə bə Xıdo munasibət və səmimiyyət çe ixlaso ibarəte. Rəməzonə manqədə əmə məhz bə Xıdo xoto Rujə qətedəmon, vəşi mandedəmon. Qirəm adi holədə jı qıley xonəxo bəmə vəşi mande dəsturi bıdo, bəvotemon ki, boçi bəpe vəşi bımandım? Əmo Ruğəmoə manqədə ımi ğəbul kardedəmon bə Xıdo xoto. Demiən çəmə səmimiyyət oşko bedə. Rujə qəte, vəşi mande bəndə bə Xıdo çanədə səmimi və sof munasibətədə bıe nişon dodə. Im manqədə çəmə Peyğəmbər (s.ə.v.s) votəşe ki, “bətı rujə qəte tosiyə kardedəm, çunki əv xalisə əməle”.
Seyid Elman ıştə votemonədə jıqo qıley parsən bə miyon nodə; “Bəs ço ibadətonədə məqər çəmə bə Xıdo xotomandiəti zınə bedəni?” , həmən cəvob dodə ki, co ibadəton,- nomoji, həcc ziyarətəi, nəzır və sədəğə doe vində əməlonin. Əmo rujə qəte vınde nıbə əməle. Iştı vəşi mande tı zınedəş, qıleyən Xıdo zınedə, tı ımi bə zıvon nıvardoş, hiç kəs əzıni. Qirəm tı dıvuən bıvotoş, həğiğəti Xıdo bəzıne. İmom Əli (ə) dəstur doəşe ki, rujə qəte bəndə de Xıdo arədə bıə əməlonədəy. Çey qəvbərujə bıe-nıbe ğeyrəz xıdo və həmonə bəndə, hiç kəs zınedəni. Bı səbəbən ım əməli səvob və mukafatiən bey Xıdəvandi-aləm dodə.
Demiən məlum bedə ki, məhz Rəməzonə manqədə ixlasin və səmimiyyətin bıe, bə Xıdo çı çur bəndəti karde bə sə dəşedəmon.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.