Yekaterinburği tolışə icma ıştə Tolişə Milliə -Mədəniə Muxtariyyət təşkilatış onoə, həmonə təşkilati sədr Elşən Həsənove
Tolışi Radio muxbiri de Elşən boyli vindemonış kardə. Məlume ki, orəxnə vaxtonədə həmonə təşkilati vey çokə koonış kardə ki, ımiən tolışi milli intibahədə əhəmiyyətinə vırəş heste. Isət Elşən boyli bı barədə bo Tolışi Radio əməson qəp bəje.
- Əssalamunəleykum, xosə Zahirəddin muəllim, əssalamunəleykum, çəmə xosə radioəməson, şımə har vaxtyon xey bıbo. Imsornə sor əmə binomon karde yanvari 29-ədə çəmə avtonomiya təmsil bıə Sverdlovsk vilayəti mərkəz Yekaterinburğ şəhərədə əmə tolışə zıvonə kursonmon oj karde, çey oj kardə mərasimən barzə səviyyədə dəvarde, əmə ımmon social mediadən pevolo kardəbe. Xeyli əğıl və çəvon valideynonən oməbin. Çə vaxtiku tosə ımruji tolışə zıvoni omute dair, bə çey tarixi bə çəmə adət ənənon, ədəbiyyati aid 12 qılə məşğələ dəvardə. Məşğəlon har həftə şanbə ruji saat 3-ku tosə 5-i dı saati dırozi be təmənno, yəni be pul dəvardedə. Əğılonən de həvəsi iştirak kardedən, ıştə adət-ənənə omutedən, çəvon nişon doə həvəs əməniən bə həvəs vardedə.
- Xeyli ali, xeyli ğəşənqe. Həmonə hırdənon bəştə dini mənsubiyyəti , bəştə dini adət-ənənəon munasibət çı cure?
- Çoko ğeydım karde, əmə bə məşğələonədə, ğeyrəz zıvoni , həmən ıştə adət-ənənəon, dini, tarixi, ədəbiyyati, yəni bə çəmə İronzıvonə xalğon çiç aide, əmə həmə bəvon omutedəmon. Imiən bıvotım ki, çə əğılon valideynon nomojəvotin, rujəbıqətin. Hətto çə əğılon arədə ki, 8 sinniku tosə 15 sinni arədən, xeyli əğılon nomoj votedən, rujə qətedən.
- Maşallah. Isət vəoməyonədə şımə təşkilati kom planonış heste?
- Lap nezə vəoməyonədə, təğribən həftəyi- dı həftə bədiqə əmə qıley vərzeşə məşğələ oj kardemon pidə. Əyo yolə sinninə əğılon həftədə 1 kərə məşğul bəben. Əmə iyo qəpmon jə. Bəmə vırən bədon. Dəvon muğavilən dəbəbastemon.
- İnşaallah. Şımə ım ko muğəddəsinə , vey çokə koe. Bı koədə bəşmə muvəffəğiyyəton orzu kardedəmon.
- Vey səğ bıbən, Xıdo şıməku rozi bıbo, əmənən şımə ğolloğədə hozomon, çimi bə peşən çəmə dasto çiç bo, əmə boştə xalği ey betəmənno bəkardemon.
- İnşaallah, təşəkkur kardedəm.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.