İron çe Ğərbi sanksion çoko dəf kardedə.

Dəvardə həftədə CNN-i məlumat doşe ki, Moskva qımon heste ki, sanksiya təsiron kam karde ro, bə İroni təcrubə muraciət bıkardo. Imən məlume ki, martə manqədə Rusiya nəğliyyati vəzir Vitali Savelevi bəyon kardışe ki, avia nəğliyyati çe sanksion təsiri jitono bekarde ro çe İroni təcrubə obəmuten. Amerikavojə təhlilqər Corcio Kafiero ğeyd kardəşe ki, çe İroni  Ğərbi sanksion dəf karde koədə de çand da soron yolə təcrubə hestışe. De Ğərbi təfriğə Moskva bə Tehroni həniən nez bəkarde.

“Kavkazskiy uzel”i bə Press TV istinadən nıvıştəşe ki, Ğərbi bə İroni iğtisadiyyati noə ğədəğəon bey vardışe bekardışe ki, Tehroni deştə tərəfdar devləton de barter kanali ticarət munasibəton onoşe. Haliyədə İroni şirkəton de xeyli, məxsusən de Asiya və Latinə Amerika keşvəron bə barterə ticarət ovaştedən.

İİR Prezident İbrahim Rəisi hələ yanvarə manqi bə Moskva rəsmi səfərədə tərəfon bə ğəror omin ki, ıştə ticari munasibətonədə bə milli valyuta ovaşton, muştərək ticarəti həcmi sori bə 10 milyard dollar bırosnon. İroni Mərkəzi Banki sədri muavin Mohsun Kərimi votəşe ki, dı qılə devləton arədə bə milli valyuta ovaşte muğavilə hozoe, tərəfon ım muğavilə şərton daxilədə ticarət bəkarden.

Ponə sori dekabrədə İroni de Pakistani barterə muğavilə dəbastışe, bə qəror omin ki, tərəfon çe İroni təbii maye ğazi de Pakistani bırzi mubadilə bəkarden. İroni Di Təsərrufati vəziri muavin Məhəmməd Ğorbani izah kardəşe ki, İroni de Uzbəkiston, Ğəzəxıston və Braziliya keşvəronən barter saziş dəbastəşe. Braziliya İroniku sef, viz, fındıx, şobalud, zəfəron mubadilə karde pidəşe. İron həmən bo əvon sori 400 həzo ton karbamid vığandedə. Braziliya Di Təsərrufati vəzir Tereza Kristina fevralə manqədə bə Tehron səfər kardışe , de İroni Nat-Kimya kompaniya karbamid ixraci barədə bə ğəror omin ki,   2 sori muddətədə bə Braziliya vığandə karbamidi həcmi sori bə 2 milyon ton bırosnon.  

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.