Əzizə Tolışon səlom, Rəməzan mıborəkə manqədə dıvo kardəm şımə nımoj-rujəon ğəbul bıbun, şıməni dəvət kardəm bə ımrujnə xəbə reportaj baxşi quş bıdənən.
Mehribonon, Urdibeheştə manqi 9 minnə rujədə, Qilon ostani 95 qılə şəhr iyən diədə de səhiyyəvi protokolon rioyəti, ımsornə sori Ğuds beynəl xalğə ruji aksiya bərpo bəbe.
Bə Qiloni tele-rədio aqentiyəti raporti əsos, Qiloni islami təbliğon həmohənqəkə şura rəis votışe: ımsor, Qilonədə Ğuds beynəl xalğə ruji aksiya bənə korona virusi pandemiya bənav bıə soron, və de səhiyyəvi protokolon rioyəti bərpo bəbe.
Huccətul İslam vəlmuslemin Əşcəri bə Qiloni dionədə, məxsus surəti ımsornə Ğuds beynəl xalğə ruji aksiya bərpo bey işorəş karde və votışe: ımsor, Ğuds beynəl xalğə ruji aksiya de ostani momin iyən Xıdo tələbə milləti iştiroki hərorətin surəti bərpo bəbe.
Əv ijən əlovəş do: Həzrəte İmom Xomeyni(r) de ım huşin və stratejik hərəkəti bois bıə, həmişə intifozə və muğavimət bəji bımando.
Huccətul İslam Əşcəri, Ğuds beynəl xalğə ruji aksiyaş, bo Fələstini sıtəm vində milləti məzlumiyəti yod varde, çokə fırsət bə hisob vardışe və əlovəş do: ımruj dınyoədə Fələstin bə iminnə məsələ əvəz bıə, və dınyo ozoditələbon iyən islami dınyo tərəfiku, çəy ozodi tələb bıdə. Və beşək vey rə dınyo mısılmonon vəhdəti sayədə, sionist hırdən əkıştə rejimi cinoyəton məhv bəben.
İşorə kəmon ki de İslamiyə inğilobi təsisəkə mərhum Həzrəte İmom Xomeyni(r)-i əmri əsos, Rəməzanə mıborəkə manqi oxonə cımə ruj Ğuds beynəl xalğə ruj nom noə bıə.
Ğuds beynəl xalğə ruj, dıyoədə həmmə milləton bə Fələstinıjon ələyh bıə, israili be ğanun iyən duə rejimi zılm və işğalçiyəti etırozi nışonəy. Dınyoədə həmmə kişvəron ım ruji vey muhim zıneydən və bə sionist rejimi ələyh yol iyən hevujə aksiyaon bərpo kardedən.