Rusiya de Ukrayna arədə hərbi munağişə dınyo vıjorədə bə taxıli behrani səbəb bəbe
Eksperton əksəriyyət bı fikirədən, çunki Rusiya, həmən Ukrayna dınyoədə taxıl istehsal kardə navnə keşvəronədən. Jıqo vəziyyət həmən Azərbaycanə Respublikadə bə taxılə behrani səbəb bıe bəzıne, çunki ım keşvər çe Rusiya taxıl idxaliku jidasti vəziyyətədəy. Boku hokuməti elan kardə rəsmi məlumatiku vində bedə ki, məmləkəti bə taxıli ehtiyac sori 3 milyon 500 həzo tone. Çey 2 milyon 400 həzo ton bə ərzağ məhsulon istehsali sərf bedə. Əmo taxıli çand hissə çe xarico idxal bıe barədə hokumət məlumat dodəni. Milli Məclisi martə manqi iclasədə Sər vəzir Əli Əsədovi elan kardışe ki, keşvəri anboonədə kifayət ğədər taxılə ehtiyat heste. Ərzağə taxıl əsasən çe Rusiyaku idxal bedə. Əyo ğıymət və rusumon şe-şe ziyod bıe səbəbiku, Respublikadən ordə, çimi nəticədə nuni ğıyməti boho bıe labude. Deputat Vahid Əhmədovi bə “Ayna” doə musahibədə votəşe ki, Azərbaycani bey lozim bıə taxıli ıştən istehsal karde ro kafi ğədər potensial hestışe. Xususən Ğərəboği zəminon ozod bıe bə peş ım potensial həniən vey bıə.
Di Təsərrufati Vəzarəti tono Ağrar Tədğiğaton Mərkəzi direktor Firdovsi Fikrətzadən ğeyd kardəşe ki, Azərbaycanədə sori 2 milyon ton taxıl istehsal kardən. Hokumət fermeronku bə taxıl perosnie həvəs varde ro bəvon çəvon kəşə xarci 40 faizi ğədər kompesasiya dodə.
Beyləğanıjə fermer Alim Məmmədov isə çe direktori votəy təkzib kardəşe, votəşe ki, hokumət bo taxıl perosnie ro bə har hektari 240 mənot subsidiya dodə. Bı koədə çəmə kəşə xarc isə ım məbləğisə 4 ğat veye. Xacmazıjə fermer Nazim Məmmədovən çe Alimi votəy təsdiğ kardəşe. Votəşe ki, sutemoni və co xidməti sahədə ğıyməton boho bıe, respublikadə istehsal bıə taxıli moyə dəyəriən boho bəkarde.
Demiən məlum bedə ki, qirəm Boku hokumət hətto bə taxıli tələbati tamamən keşvərədə istehsali nail bıboən, ordə və nuni ğıyməti boho be vəy se nibəzıne.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.