De miladi təğvimi mayə manqi 13 Rujə ide. Çe Ali Rəhbər Seyid Əli Xameneyi idarə tono Ovşumi muəyyən kardə komitə məlumat doəşe ki, Şəvvalə manqi ovşum bə ım ruji muvafiğ omedə və həmonə ruj Fitrə idə ruje.
Bə Maide.az sayti doə xəbə əsasən bo ımsornə Fitrə zəkati məbləğ bə 3 kilo qandım və ya bırz, xımo və bənə bımon ğida məhsulon bənine. Har kəs bəştə mərami muvafiğ bənə ekvivalenti ey de puliən avjor karde bəzıne. De muəyyən səbəbon rujə qəte imkanədə nıbə odəmon kəffarə miğdar isə bo har rujə nığətə ruji 750 ğrəm qandım, və ya ordə, bırz, nun və bənə bımon ərzağ bıe bəzıne.
De ım əzizə İdi əlağədar Ali Rəhbər Ayətullah Xamenei 2187 nəfər məhbusi əfv karde barədə roziəti doəşe. De ım xahişi İroni Məhkəmə Sistemi sərdar Seyid İbrahim Rəisi bə Ali Rəhbəri muraciət kardəşbe. Ali Rəhbəriən ım məsələ musbət həll kardəşe.
İroni İslamiə Respublika prezident Həsən Ruhaniən de Fitrə idi munasibəti bə islamiə məmləkəton təbrik votəşe, bo dınyo həmə insonon səloməti, sulh, əmniyyət və oromi orzu kardəşe.
Azərbaycanə Respublukadən bə Vəziron Kabineti ğərori əsasən mayə manqi 13 və 14 minə rujon bənə Fitrə idi ğeyd bəbe. Sputnik Azərbaycani ğeyd kardəşe ki, Respublikadə de koronavirusi əlağədar məçiton dəbastəşone, bı səbəbən əyo idə nomoj vote mumkun nibəbe. Odəmon ıştə kədə deştə ailə bahəm im mərasimi icra kardənin bəben. Prezident İlham Əliyevi ıştə Tvitter səhifədə çe har kəsi Rəməzonə id təbrik kardəşe.
Ğəfğazi Mısılmonon İdarə sədr Şeyxulislam Allahşukur Paşazadə de Mubarəkə Rəməzonə idi munasibəti bə Azərbaycani xalği təbrik votəşe, orzu kardəşe ki, Xıdo çəvon qətə rujə, votə nımojon ğəbul, çəvon kardə dıvoon mustəcab bıkardo. Bə ĞMİ Ğaziyon Şura doə fitva əsasən ımsornə fitrə zəkati miğdar bo har kəsi 5-10 mənoti ğədərədə bənine.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.