Boku hokuməti dəvardə rujonədə ıştə tosə 2025-minə sori qıley layihə bə cəmiyyəti edaştışe, əyo elan kardışe ki, ım vədə omə 4 sorədə keşvəro ğeyri-natə məhsulon ixraci 2 ğat ziyod bəkarde. Əmo iğtisadi analitikon bımi bovə kardedənin
Nemət Əliyev “Azadlıq.info” saytədə nıvıştedə ki, hokuməti ım mevzuədə elan kardə perspektivə planon həmişə iflas bıən. İlham Əliyevi hələ 2012-minə sori dekabrədə proqnoz doəşbe ki, tosə 2020-minə sori ğeyri-natə sektorədə ixracati həcm har şəhrıvandi nisbətədə 1 həzo dollar təşkil bəkarde. Hokuməti haliyədə elan kardə rəğəmono oşko bedə ki, ponə , yəni 2020-minə sori çe Az.R bə xaric vığandə ğeyri-natə məhsul 1 milyard 851 milyon dollar bıə. Imən bə keşvəri əhali nisbətədə 184 dollar təşkil kardedə. Ekspert jıqo holədə de ritorik qıley parsi votedə ki, 1 həzo dollar bə ke, 184 dollar bə ke? Əv ımiən bə əhandon nəzə rosnidə ki, 2012-minə sori respublika iğtisadiyyati ixrac kardə ğeyri-natə məhsulon bə keşvəri əhali nisbətədə (182,4) 182 tam dadə ço dollar bıə. Dəvardə 8 sorədə Əliyev hokuməti nişon doə fəaliyyəti nəticə ım bıə ki, ey ğeyri-natə sektor cəmi 1 dollar nimi ğədərədə inkişaf kardovnie zınəşe.
2018-minə sori İlham Əliyevi keşvərədə kıvləvonəti inkişaf kardovnie barədən anons doəşbe ki, 2019-minə sori kıvlə istehsali bə 1 həzo ton, 2025-minə sori isə bə 6 həzo ton bərosnen. Bımi ro məmləkəti 30 qılə rayonədə çe Cino vardə bohoə tuə toğəon kaştışone. Im rayonon məktəb və əğılə bağçəon bə kıvləxonə peqordınişone. Bı rujonədə hokuməti elan kardə statistik rəğəmonku məlum bə ki, pionə sori məmləkətədə 1 həzo ton ne, 643 ton, ponə sori isə cəmi 446 ton kıvlə istehsal karde mumkun bıə. “Azəripək” Məhdud Məsuliyyətinə Cəmiyyəti i sornə ziyan isə 268 həzo mənot bıə. Devləti ım proyekti icra karde ro Ciniku hıriə tuə toğəon, kıvlə melıon, bə kıvləvonon doə subsidionən bə nəzər buəmon bəvədə ım ziyani həniən vey bıe bəvindemon. Muxalif Milli Şura həmsədr Cəmil Həsənli və əhandon yod vardedə ki, Azərbaycani Xalğə Cəbhə hakimiyyəti sorədə məmləkətədə kıvlə istehsali həcm 5 həzo 222 ton bıə. Iştənən bey devləti tərəfo hiç 1 mənotən vəsait xarc bıə nıbe. Əliyevon hakimiyyəti devrədə kıvləvonəti 11 tam dadə 7 kərə kam bıə. Hejo iğtisadiyyati co sahonədən vəziyyət ım ğədər bərbode.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.