Boku hokuməti dini fəalon səpe tojə həmlə bino kardəşe

taleshi radio 3 views
Oktyabrə manqi 19-də Dini Etiğad və Vijdanə Azadion Mudafiə Mərkəzi sədr, çe İcərişəhər “Cumə” məçiti axund, “Dəyərlər” rujnomə və “Dəyərlər” Azerbaijan İslam Nevvs internet portali sər redaktor Hacı İlqar İbrahimoğlu çe Boku hokuməti Devlətə Əmniyyətə Xidməti həmkaron dastqir kardışone, bardəşone bo istintağ karde

“Mudafiə Xətti” huğuğə mudafiə təşkilati direktor Rufət Səfərovi ım xəbə ıştə “Fasebook” səhifədə pevolo kardəşe, həmən məlumat doəşe ki, çe İbrahimoğlu kədə axtarış bardəşone. Im hadisəku ləzi bə nav Hacı İlqar ıştə “Fasebook”ə səhifədə bə on-layn rabitə beşbe və hadisə barədə qəp jəşbe. Ruji bəçəton  Meydan TV xəbə doşe ki, maştə subhədəli Hacı İlqar çe DƏX –ku bə kə vadoəşone. Peşo ey ıştənən ım fakt təsdiğ kardəşe, əlavən votəşe ki, çand saat dey sual-cəvob bardəşone, çeyku bə həmə parson cəvob se bə peş əvşon sərbəst vadoə.

Çe Hacı İlqar İbrahimoğlu istisadiyyat, fəlsəfə və ilahiyyət sahədə ali təhsil hestışe. “İslam və Ğərbi fəlsəfə inteqrasiya” mevzuədə dissertasiya mudafiə kardəşe. “Hikmətə kə”nominə disputə mərkəzi və “İslamiə maarif” proqrami elmi rəhbəre.

“Yeniçağ.az” saytiən xəbə doəşe ki, həmonə ruji ğeyrəz Hacı İlqari həniən 4 nəfər nufuzinə şiə dini xadimon çe Devlətə Əmniyyətə Xidməti tərəfo dastqir bıən. Şeyx Sərdar Hacıhəsənli Masəluədə qətəşone, bardəşone bə Boku. Hacı Cəlal Şəfiyev, Hacı Ğadir Məmmədov və Təmkin Cəfərovən dastqirbıə odəmon restədən. “Teref.az” əvoni bənə “Azərbaycani Ruhanion Məclis” nominə ğeyri-leqalə təşkilati uzvon təğdim kardedə, ehtimalən votedə ki, çe Azərbaycan və İroni arə munasibəton qıvonəti bə ım şəxson dastqir karde səbəb bıe bəzıne. Həmən bə “Konkret.az”sayti əsasən xəbə doəşe ki, Respublika xususiə xidmətə orğanon Sumğayıt, Ğuba, Dəvəçi və Masəlu şəhəronədə əməliyyatə tədbiron dəvuniəşone.

Təmkin Cəfərov çe “Maide.az” sayti sər redaktore. Im 4 nəfəri vəziyyəti həxədə nə sosialə şəbəkəonədə, nəən Respublika Kutləviə İnformasiya Vasitəonədə soəx doə informasiya, hələ ki, bə çəş qıniə ni.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.

 

Add Comments