Rizvonşəhri Sepah təşkilati fərmondə votışe: de bəsic haftə həmzəman ın şəhrədə 220 qılə muxtəlif mədəni, hınə, varzış və bəsirəti mərosimon icra bəbe.
Bə İrna raporti əsos, palkovnik Muhəmməd Purismoili bə jurnaliston votışe: ımsornə sori bəsic haftə mərosimon de bə millət xidmət kardey mehvəriyəti iyən de "bəsic çı milləti coni i baxşe" şuari bino bəbe.
Əv votışe: diyəroə dionədə bə di sakinon xidmət rosniye ın haftədə vey muhimmə koonin.
Rizvonşəhri Sepah təşkilati fərmondə əlovəş karde: de cımə imomon vindemon, bə şəhidon və veteranon ailəon osə ğande, mədəni iyən varzış mısobiğəon, muğaviməti iğtisodi planon istismor, hərbi marş, namə canq və kiberi əsqəron iclos, dionədə bə şəhidon ehtırom noe mərosim, Şəhid Suleymani nomo hərbi təlim və co bəsirətinə mərosimon əcumlə muxtəlif mərosimon ki Rizvonşəhrədə bıə ımsornə sori bəsic haftədə icra bəbe.
Palkovnik Muhəmməd Purismoili bə bəsic təşkilati məsuliyət iyən koon işorəş karde və votışe: İroni nizomi dustonro bəsic çı əmniyət və umidi simvol iyən bo dışmenon bənə noəmni icodəkə amile.
Çandə səlomət xidməton, humanitar koməkon təğsim karde iyən məktəbon və sosiyal şəbəkəonədə bərnamon dəvoniye həm de bəsic haftə həmzəman Rizvonşəhrədə pərpo bənine.
De İmom Xomeyni(r)-i əmri bərobər, Hicri şəmsi 1358 minnə sori Azər manqi 5, Bəsic təşkilat təsis be.
İroni təğvimədə Aban manqi 29 tosə Azər manqi 5 Bəsic haftə nom noə bəy.