Rusiya de Ukrayna hərbiə munağişə 2-minə ruji Ukrayna prezident Zelenski Rusiya tərəf bə molağat dəvət kardışe, Rusiya bımi rozi bıe, Prezident Putini hətto bəştə ərteşi hərbiə əməliyyaton oğəte əmr doşe
Peşo məlum bıe ki, Ukrayna tərəfi ım arameşiku istifadə kardışe, ıştə arteleriya və raket ovdonon bə şəhəron vardışe, çe əhali sıft jimon kardə məhəllonədə dəğandışe. Ruji bədiqə Ukrayna tərəfi dıminə sulh təklif doşe, Rusiya ijən bımi rozi bıe, əmo Putini bə ərteşi dəstur doşe ki, hərbi əməliyyaton onığəton, əvoni dəvom bıkardon. Dıminə sulhə molağat bo fevrali 27-minə ruji çe Belorusiya Qomel şəhərədə bə saat 15 təyin bıe. Əmo Ukrayna tərəf ijən bəştə və`di xilaf beşe, bə həmonə tədbir nıome. Jıqo vəziyyətdə Belarusiya Prezident Lukaşenko bı məsələ umjən qınie. Ey bə Belorusiya jurnaliston parsi cəvobədə izah kardışe ki, həmonə ləhzədə de Zelenski telefonə qəp je cəhdon kardəşe, seminə cəhdədə axır ki, dey qəp je mumkun bıə, əvış rozi eğande ki, ım hərbi munağişə orıxnie ro imkani çe dast nıdo. Nubəti sulhə molağat bo fevrali 28-minə ruji de Moskva vaxti bə saat 12 təmom Belorusiya de Polşa marzi nezi Qomel vilayəti əraziədə dəvunie nəzərədə qətışone. Ukrayna numayəndon bə ım məntəğə de Belorusiya ərazi, yəni de nezə roy ne, de Polşa ərazi varid bin. Rusiya numayəndə heyəti sərdar çe Putini koməkkar Bladimir Medinskiy be. Bə Ukrayna numayəndon Mudafiə vəzir Aleksey Reznikov sərdarəti kardedəbe. Həmonə ruji molağaton iminə raund bə orəx rəse. Çey bə peş Medinskiy bə muxbiron jıqo votışe, tərəfon bə ğəror omən ki, molağatonədə bə miyon omə təklifon deştə devləti rəhbəriyyəti no-peğət kardə bəpeş, nezə rujonədə ım didori dəvom bıkardon. Rusiya Teleqram kanalonədə məlumat heste ki, ım tədbirədə Mariopulədə bə muhasirə eqıniə Ukrayna hərbiə qıvvon tale və atəşbast elan karde barədə muzakirəon şəən.
Rusiya təhlilgəron əksəriyyəti fikir jıqoy ki, Ukrayna tərəf de jıqo vasitə ıştə nasistə rejimi muhafizə karde, Ğərbi bey vəd kardə hərbiə koməki se ro vaxt bə dast varde pidəşe. Bə səbəbən Rusiya tərəf hərbiə əməliyyaton dəvom kardedə. Çey Mudafiə Vəzarəti elan kardə orəxnə məlumatədə votə bedə ki, tosə ısət Rusiya ərteşi və kosmik qıvvon çe Ukrayna 1114 qılə hərbi obyekt – çəvonədə 314 qılə tank və co zirehinə texnika, 274 qılə hərbi avtomobil, 31-qılə hərbiə qıvvon idarə mərkəz məhv kardəşe.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.