Dəvardə həftə Vyana molağatonədə fasilə bə əməl ome barədə xəbə pevolo bıe. Həmən Amerika tərəf bımədə Rusiya qınokar zınedəbe, votedəbe ki, Rusiya de İroni atom proqrami obast nıbə məsələon bə muğavilə şərton daxil karde pidəşe
Dışanbə ruji Rusiya XKV elan kardışe ki, molağaton deştə ğaydə, befasilə dəvom bəkarde. Çimi bə nav İroni XKV rəsmi numayəndə Səid Xətibzadə bəyon kardışe ki, AİŞ bə kali vacibi ğəraron rozi bıə bəpeş muğavilə bərğəror bəbe.
İbə Ştaton devlətə katibi muavin Uendi Şerman isə çe Amerika tərəfi mevğe jıqo izah kardışe: “Əmə çe İroni nuvə silahi bə dast varde imkaniku vey norohətimon, bəpe əmin bıbəmon ki, İron hiç vaxt bə jıqo silahi malik nibəbe”. “İran.ru” sayti bənə çimi cəvobi nıvıştışe ki, İroni tərəfi bə çand bəjəm bəyon kardəşe ki, atom silahi soxte niyyət nişe, hətto İslamə İnğilabi rəhbər Ayətullah Xameneiən deştə fətva ım ğədəğən kardəşe.
İroni Xarici Koon vəzir Huseyn Əmir-Abdullahian deştə Katarıjə həmkar şeyx Əbdul Rəhman Əl Tani telefonə qəpədə ğeyd kardəşe ki, Amerika bı molağatonədə tojə məsələon bə meydon şododə, əmə isə ğoym və etibarinə muğavilə bə dast varde ro ciddi ko bardedəmon.
Seşanbə ruji Əmir-Abdullahyani bə Moskva səfər kardışe, deştə həmkar Lavrovi didor dəvunişe. Didori bə peş dəvardə mətbuatə konfransədə ey ğeyd kardışe ki, qirəm Amerika tərəf çe İroni sıə xətt hisob kardə kali məsələon ğəbul bıkardo, bəvədə Vyana qəpon de muvəffəğiyyəti bə orəx bərəsen. Bı koədə çe Rusiya pozitiv, həmən konstruktiv rol hestışe. Lavroviən izah kardışe ki, amerikavojon əməni pidəşone muğavilə bə mışğıl eğandeədə qınokar bızınon. Im dıvue. Muğavilə hələ kali paytaxton tərəfo təsdiğ bıəni, Moskva həmon paytaxton restədə ni. Lavrovi həmən votəşe ki, çey həmkar Əmir-Abdullahyan`i əv bə Tehron dəvət kardəşe, əvən ım dəvətış ğəbul kardə.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.