Ukraynadə hərbi əməliyyat orəxə bə peş Ğərbi fəaliyyəti həxədə xeyli yavə fakton bə oşko bebəşe.

Bı səbəbən əvon de har vasitə ım hokuməti mudafiə kardedən. Çunki çəvon Ukraynadə onoə ım hakimiyyəti suğuti bə çəton Ğərbi həmə postsovet məkanədə bənə  Amerika hərbi – bioloji labaratoriyon xeyli co yavə faktonən bə oşko bebəşe. Im sıxanon çe Rusiya İMT-ədə daimi numayəndə Vasili Nebenzya bə “Rossiya 1” televiziya kanali musahibədə votəşe. Ey həmən izah kardəşe ki, Amerika tərəfi ıştə ım laboratoriyon fəaliyyəti de jıqo qıley sırəvardə vonə eparçınie pidəşe ki,  məvotbən İMT həmonə fəaliyyəti mevcudiyyəti təsdiğ kardedəni. Im vonə bəə səbəb sırənine ki, har qıley hərbi-laboratoiya fəaliyyət apriori məxfi bedə, çey fəaliyyəti barədə hiç kəs bə hiç qıley təşkilati, əz cumlə bə İMT-ən raport dodəni. Nebenzya bə jıqo qıley faktiən işarə jeşe ki,  Ğərb , həmən Ukrayna çok əbi ki, Moskva vardə subuton təbliğat hisob karde əvəzi, həmonə fakton rəsmən təkzib kardə arqumenton bə miyon bəney.

Rusiya hərbi ğıvvon marti 20-nə şəvi  Ukraynadə bə xarici mıjdiə sərbozon təlim doə qıleyən mərkəzi, bı səfə Rovno vilayətədə Novaya Lyubomirka poliqoni raketə zərbə jəşe. Bı həxədə Mudafiə Vəzarəti sıxanəvot Konaşenkovi məlumat doəşe, votəşe ki, jıqo zərbə bə çəvon hərbi anboən jə bıə. Çımon nəticədə kamiku 80 nəfər  xariciə mıjdiə sərbozon məhv kardəşone. Çimiku i ruj bə nav bə Jitomiri ətrofədə ğəror qətə co qıley xariciə mıjdiəvonon mərkəziən jəqo raketə həmlə təşkil bıe, əyoən tosə 100 nəfəri mıjdiəvonə sərboz kıştə bıe. Ey əlavən kardəşe ki, orəxnə 1 rujədə rəğibi 44 qılə hərbi obyekt, əz cumlə 4 qılə komanda ğərarqoh, 6 qılə “Buk M1”raket kompleks, 4 qılə silahə ambo, 2 qılə bepilotə ıştənpər çe restə bekardəşone. Ukraynadə hərbiə əməliyyaton bino bıə rujiku tosə ısət Rusiya hərbiə qıvvəon  çe Ukrayna 216 qılə bepilotə ıştənpər, 332 qılə zenit raket kompleks, 1506 qılə tank və co zirehinə maşin, 1284 qılə xususiə hərbi avtomobil məhv kardəşone.

İbrimi Zahirəddin, çe Rusiya Yekaterinburğ şəhəriku, İİR sədo tolışi radio.