Çe Prezident Seyid İbrahim Rəisi yanvarə manqədə bə Rusiya səfər, de Vladimir Putini vindemon, Devlətə Dumada nitğ ehande, ım dı qılə devləton munasibətonədə qıley tojə mərhələ bino noşe
Çe “İran.ru” sayti həmkar Vladimir Onişenko nıvıştedə ki, İroni bə Avroasiya həmkarəti umjən qınie təşəbbus pozitiv qıley proses be bəzıne.
Məlume ki, çe Rusiya Ukraynadə hərbi əməliyyaton bino karde Qərbi tərəfo bə çey əleyh bə qıvoninə sanksiyon səbəb bıe. Rusiya Nəğliyyati vəzir Vitali Savelevi ğeyd kardəşe ki, əvon ım sanksiyon təsiri kam karde ro İroni təcrubəku istifadə bəkarden. İron da sorone ki, bə Ğərbi sanksiyon məruz mandə, çey kafi ğədər bı koədə təcrubə hestışe, sanksiya təsiron çe arə barde roədə çe Tehroni məsləhəton bo Moskva xeyli foydəş bəbe.
“İran.ru” bə İRNA istinadən xəbə doəşe ki, İroni Kemruqə idarə numayəndə Ruhullah Lətifi tosə ımsornə fevralə manqi İroni deştə 15 qılə hamsuə devləton ticari devriyyə miğdar oşko kardəşe. Ey votəşe ki, ım devriyyə çe 46 milyard dollarisən dəvardə, bə ponə sori nisbətədə 14 milyard dollar veye. De Rusiya ticarətən 81 faiz ziyod bıə, 4 milyard dollari dəvardə.
İroni Rusiyadə səfir Kazem Çəlali de TASS aqentiyyəti musahibədə məlumat doəşe ki, İroni de Avroasiya İğtisadi Həmkarəti təşkilati saziş dəbaste ətrofədə molağaton bino bıən, həmən izah kardəşe ki, bank və maliyyə sahədə İron-Rusiya rəsmi dairəon arədə daimi əlağəon mevcude, nezə vaxtonədə həmkarəti barədə muxtəlifə ğəraron ğəbul bəninin. Cəlali əlavən votəşe ki, İroni Yekaterinburğ şəhərədə diplomatikə numayəndəqoh oj karde məğsəd hestışe. RİA Novostiən bə Cəlali votəyon istinadən xəbə doəşe ki, Tehron – Moskva rəsmiyon “Mir” pulovoştoniə sistemiku muştərək istifadə məsələ muzakirə kardedən.
İron-Rusiya parlamenton arədə həmkarəti qrupi sədr Ebrahim Rezayiən votəşe ki, tərəfon ıştə ticari, bank-valyuta koonədə çe dollariku bə milli valyuta ovaşte barədə bə ğəror omən. Ey ımən ğeyd kardəşe ki, Avroasiya məkanədə beynəlxalğə ticari devriyyə sori 300 milyard dollari ğədərədəy, İroni bə ım ticarəti umjən qınie çey iğtisadi inkişafi həniən barz bəkarde.
Çe Rusiya İronədə səfarəti muşavir Mixail Fyodorov bə İran Daili votəşe ki, nezə vaxtonədə Moskva Tehronədə fərhənqə mərkəzi onoe fikir hestışe. İroni fərhənqə mərkəz 10 sore ki, Moskvadə fəaliyyətədəy, ey dı qılə devləton arədə mədəni əlağəon inkişafədə xeyli foydəmandə xidmətış heste.
Rusiya “Aeroflot” şirkətiən elan kardəşe ki, apreli 2-ku Moskva – Tehron reyson bərpo bəkarde.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.