Boku Apelyasiya Məhkəmə Qəncə hadisə məhbuson hukm ğıvvədə oqətışe.

Yunis Səfərovi ım iclasədə həmonə hadisə səbəbon barədə ətrofin votemon ehandəşe. Ey qəp jəşe ki, Qəncədə jıqo qıley ənənə hestbe, hətto Soveti vaxtonədən Aşura ruji şəhəri mərkəziku tosə Şah Abbas məçiti əhali şemon dəvordıni. Elmar Vəliyev bə Qəncə icra sərdar təyin bəcəğin de polisi vasitə həmonə ənənə və de zori seşe. Har qıley sivil cəmiyyətədə əhali tərəfo dinc şemonon dəvunie normal qıley hole. Anormal, diktatura hukum kardə cəmiyyətonədə çımi vəy de zori sedən.

Meydan TV təsvir kardedə ki, hakimi piəşe, çe Yunisi sıxani ebırio, əmo Yunisi ıştə votemon ım məzmunədə dəvom kardəşe, jıqo votəşe: “Az hadisə əsl səbəbi izah kardedəm. İ sor Aşura bə vıjorə ruj eqıniəbe. Əmo Vəliyevi əmr kardışe ki, məktəbonədə dərson dəvom bıkardo. İ sor Aşura ruji ey Qəncədə şərab festival dəvunişe, məçitonədə əzon ğədəğən kardışe, bə məçit de məşo dəşedəbe, əyo ibadət kardəkəson de qonə sıxanon təhğir kardedəbe. Çe Cavad xani məğbərə rıjnişe. Az tosə ısət mot mandəm ki, ıştəni ruşinəfam hisob kardə odəmon bımi boçi ıştə etiraz bə zıvon nıvardışone.  Vəliyevi anədə təhğiramizə hərəkəton bey səbəb bıe ki, az jıqo qıley qəm şodome.” Səfərovi həmən əlavə kardəşe ki, bı koədə əv tənho bıə, bey hiç kəsi komək kardəş ni. Qirəm ım çinayətə ko beğərəz, de insofi təhğiğ  bıbo, məlum bəbe ki, miyonədə hiç qıley mutəşəkkilə dastə bıə ni, bə Vəliyevi sui-ğəsdədə ittihom bıə əmandə məhbuson hiç qıley qıno nişone.

Vəkil Şəhla İskəndərova bo Azadi Radio qəp jəşe ki, bə Respublika Ali Məhkəmə şikayət bəkarden. Əyoən jıqo ğəror doə bə peş bə Avropa məhkəmə muraciət bəvğanden.

Məhbus Cəfər Zalovi jimoni həmro Qunay Zaloviən ğeyd kardəşe ki, “əmə apeliasiya məhkəmə jıqo ğərori çəş kardedəbimon. Əmo məhbuson ailə uzvon ğəlbədə zərrə ğədərən bıbo, qıley zəifə umu hestbe ki, qasbu çımon dılədə insof bə əməl bo. Əmo əvon çəmə zənn kardəysən bədtər beinsof, beəmon və ğəddorinbən”.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.