Orəxnə 10 soronədə Boku ətrofədə xeyli jimonə bina massivon inşa kardəşone. Əmo bı massivonədə vahid kanalizasiya sistem onınoe bə xeyli ekoloji probliemon səbəb bıə
Abşeronə nimcəzirə əraziədə hırdo-dıjd tosə 800 qılə qolə və xıl heste. Ətrof məntəğəku omə kanalizasiya ovon bə ım xılon ru bedən. Imiən həmonə ovə hevzəon bə çırkov peqordıniəşe. Ekoloqiya və Təbii Sərvəton Vəzarəti Devlətə Ekoloji Ekspertiza Aqentiyyəti sədr Mirsalam Ğənbərovi bə “Sputnik Azərbaycan” sayti məlumat doəşe ki, əvon çe ım ovə hevzəon monitorinq bardəşone, ımoni təmiz karde ro sıftə çəvon lırdin bıe mənbə və çey tərkibi omute, həmən bəvon çırkovi ru karde vəy se lozime ki, bımi roən bəpe vahid kanalizasiya sistem soxtə bıbo.
Sabunçi rayoni Kurdəxonə ğəsəbədə inşa bıə tojə məhəllə əhaliən kanalizasiya xətti nıbe səbəbiku xeyli əziyyət kəşedən. Çəvrey əji Akif Huseynov votedə ki, əvon əyo bo kə inşa karde ro zəmin hıriədə rayoni məmuron nezə vaxtonədə kanalizasiya xətti okırnie vəd doşıne, əmo bey əməl nıkardışone. Haliyədə voş voəcəğın xandəxi çırkovon bə soon, hətto bə kəy dılə ru bedə, ətrofi buəvulə eqətedə. Nəmiku kəon divoon həmə kif noəşe. Odəmon kuçəonku de çəkmə dəvardedən.
Çe Boku Nizami rayoni 8-minə kilometr vıjori ətrofədə mevcud antisanitariya həmonə həndəvəri əjion bə zinhor vardəşe. Əvon axır ki, noəloc mandən ıştə ım dardi barədə bə Meydan TV şikat kardəşone. Fərid Babayevi izhar kardəşe ki, həmonə vıjorədə mol kıştedən çey qujdi əyoən havatedən. Kıştə moli eməyon xeyli muddət dəparçınidənin, çəvon buəvuləku ətrofi kəonədə mande mumkun bedəni. Jıqo notəmizəti, antisanitariya həxədə bə Nizami rayoni icra hakimiyyəti çand bəjəm şikat kardəşone, əmo bə ım beaburinə vəziyyəti hiç kəs əncom kəşe zınedəni.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.