Amerika Devlətə Departamenti dıyoədə bə dini azadion vəziyyəti aid ıştə hesabatədə Boku hokumət dəvət kardışe ki, dini huğuğonku istifadə cəhdi gorə muhakimə bıə odəmon azad bıkardo
Meydan TV xəbə doəşe ki, Devlətə Departamenti numayəndə Daniel Nadel`i bə ım hesabati həsr bıə brifinqədə votəşe ki, “əmə Azərbaycani hokuməti dini fəalon həbs karde, əvoni bə işqəncəon məruz oqəte həxədə məlumaton sedəmon. Haliyədə əyo zindonədə tosə 50 nəfəri dini məhbus heste.”
Im hesabatədə Qəncə məhbuson vəziyyətiən vırə qətəşe. Ğeyd bedə ki, ım qrupi odəmonədə 43 nəfər ısətən zindonədən. Misılmonon İbemonə Hərəkati barədə ğeyd bedə ki, hokumət əvoni bənə ekstremist təşkilati zınedə, bə devlətə ğeydiyyat dənodəni, de ım təşkilati əlağəninə şəxson munasibətədə muhakimə koon dəvom kardedə.
Hesabatədə dini icmaon vəziyyəti həxədə votə bedə ki, Boku hokumət uzvon miğdar 50 nəfərisə kam bıə icma ğeydiyyato dəvunieku imtina kardedə bə səbəb ki, fileyğə əvon bə ekstemizmi təşviği xidmət kardedən. Hokuməti həmən bə beicazə dini ədəbiyyati nəşr və pevolo karde səpe ıştə nəzarəti həniən zümand karde ro ım hərəkət bə cinayətə əməlon restə dəğandəşe. Əvvəl bə ım koy qorə inzibati cəzo və ya cərimə nəzərədə qətedəbin, ısət bə ım əməli ro doəkəson bə zindonə cəzo məhkum bəkarden.
Hesabatədə ğeyd bedə ki, Əliyevi hokuməti bə dini kamiyon - yəhudi, rus pravoslav, katolikə icmaon praqmatik munasibət , bə çəvon fəaliyyəti hətto maliyyə koməkon kardedə, əmo bə digər dini cameon ənədurumə munasibət nişon dodə. Amerika Beynəlxalğə Dini Azadion Komissiya Azərbaycanə Respublika, həmən Turkiyə “dini azadion de hoziəti darışte” səbəbiku bəştə nəzarətədə bıə devləton siyahi daxil kardəşe.
Boku rəsmiyon isə keşvərədə həmə dini azadion tam təmin bıe, bı sahədə hiç qıley mışğıli mevcud nıbe votedən, huğuğə mudafiəkaron oşko kardə fakton daima bə həşə jedən.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.