Vəziron Kabineti tono Operativə Ğərorqohi iyunə manqi 10 –minə rujiku bə məçiton fəaliyyəti icazə doşe
“Sputnik Azərbaycan” sayti muxbir həmonə ruji odəmon əhvoli omute ro bə Boku şəhəri Əjdərbəq məçit şə, çəvrey subh nomojədə iştirak kardəşe. Həmonə vaxti məçitədə 46 nəfər bıə. Siə və sınnion i vırədə nomoj votəşone. Həmonə odəmono qıley - Rafiğ Əliyevi ıştə fikron de muxbiri baxş kardəşe, votəşe ki, “şukur bıbo bə xıdo ki, ey ıştə kədə bə mı ibadətış nəsib karde. Əmə i sorbe ki, ım ruji bə çəş bimon. Az ımruj bə məçit oməm, nomoj bıvotım, dıvo bıkəm, nəzır bıdom.”
Sayti muxbir çoştə nomoji barədə nıvıştedə ki, zohr nomojədən Əjdərbəq məçitədə odəm anəhoyən vey nıbe. Çimiən səbəb bə odəmon iştiraki noə məhdudiyyəton bin. Məçiti kəybəku nəzarətkar mandəbe, Kovidə pasport nıbə odəmon bə məçit vadodənıbie, həmən nəzarət kardedəbe ki, məçiti dılədə odəmon miğdari 50 nəfərisə vey nıbo. Hətto i nəfəriku jıqo sənəd nıbe səbəbiku əv bə məçit vanıdoşe, həmonə odəmən şe məciti həndəvəri boğədə ıştə nomojış vote. Nəzarətkari bo muxbiri izah kardəşe ki, “ əvon hiçən pidəşon ni ki, bə ibadət omə odəmi çe Xıdo kəyku oqırdınon. Əmo ım çe hokuməti ğərore, əmə bəpe ey icra bıkardəmon”.
Məçiti imom, həmən çey icma sədr Haci Həmdulla Babayevi bə muxbiri votəşe ki, 1 sor 4 manq bıe ki, məçiton bə məlum səbəbi qorə dəbastəşonbe. Isət Əjdərbəq məçit bə Operativə Ğərorqohi noə ğaydə muvafiğ ıştə fəaliyyət bino kardəşe. Məçitədə 20 nəfər ko kardedə. Çəvon həmə kovidə pasport hestışone.
Çəyo muxbiri nəğl kardəşe ki, əv çe məçito beşə bə “28 Mall” ticarətə mərkəz omə. Əyo xeyli odəm hestbe. Dəşəsədə odəmon temperaturi pamudənıbin, kafeonən ko kardedəbin, bəştə qəvi maska nıjənəkəsonən hestbin. Yəni oşko vində bedəbe ki, jıqo izdihaminə vırədə bə camaati iştiraki hiç qıley məhdudiyyəti nıbe holədə, bə məçit bo ibadət karde omə odəmon fəaliyyəti ro anədə məhdudiyyət tətbiğ kardəşone.
İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.